İran Parlamentinin sədri Məhəmməd Bağır Qalibaf istefa verərək danışıqlar qrupunu tərk edib.

"Unikal" xəbər verir ki, bu barədə İsrailin N12 News televiziya kanalı məlumat yayıb. Kanal iddia edir ki, bu, İslam İnqilabı Keşikçiləri Korpusunun (İİKK) müdaxiləsindən sonra baş verib.

Daha əvvəl "Iran International" mənbələrə istinadən bildirib ki, İran liderləri arasındakı mübahisələr İran nümayəndə heyətinin ABŞ-la danışıqlar aparmaq üçün İslamabada səfərini pozub. Nəşrin məlumatına görə, İran prezidenti Məsud Pezeşkianın müttəfiqləri ilə Ali Lider Müctəba Xameneiyə yaxın şəxslər arasında mübahisələr səfərin son anda ləğv edilməsinə səbəb olub.

"Məsələ ilə tanış mənbələrə görə, nümayəndə heyəti Xameneinin ətrafından nüvə məsələlərinin müzakirəsini qadağan edən və Xarici İşlər Nazirliyinin komandasına əvvəlki danışıqlar raunduna görə töhmət verən mesaj gələndə yola düşməyə hazır idi", - deyə nəşr qeyd edir.

Nəticə etibarilə, İranın xarici işlər naziri Abbas Əraqçi xəbərdarlıq edib ki, bu cür məhdudiyyətlər altında danışıqlar mənasızdır və uğur qazanmaq şansı yoxdur.