Biz çalışırıq ki, ev təminatı məsələsində maliyyələşməni əlçatan və dayanıqlı edək.
"Unikal" xəbər verir ki, bu barədə maliyyə nazirinin birinci müavini Anar Kərimov Birləşmiş Millətlər Təşkilatının (BMT) Ümumdünya Şəhərsalma Forumunun 13-cü Sessiyası (WUF13) çərçivəsində “Mənzil maliyyələşdirilməsi üçün yeni bir saziş” mövzusunda keçirilən panel iclasında çıxışı zamanı deyib.
“Biz nəinki gələcəyi formalaşdırırıq, gələcək də bizi formalaşdırır. Ev siyasəti ev tikməklə məhdudlaşmır. 2030-cu ilədək dünyanın 30 faiz əhalisinin ev təminatı məsələsinə ehtiyacı olacaq”, - deyə nazir müavini əlavə edib.
Nazir müavini bildirib ki, mənzil siyasətində maliyyələşmə ilə yanaşı idarəetmə də vacibdir: "İpoteka modelini çox vacib edən nədir? O, təkcə dövlət dəstəyini deyil, həm də kapital bazarı maliyyələşməsini birləşdirir. Çünki biz çox danışırıq ki, bu, təkcə maliyyələşmə deyil, həm də idarəetmə ilə bağlıdır. Beləliklə, bir tərəfdən hökumət həssas qruplar üçün güzəştli sosial ipotekaları dəstəkləyir; digər tərəfdən isə daxili kapital bazarında istiqraz emissiyası mövcuddur. Və bu balans çox önəmlidir.
Standart ipotekalar vətəndaşlar üçün əlçatandır, lakin qaçqınlar, məcburi köçkünlər, hərbi qulluqçular, sosial cəhətdən əhəmiyyətli qruplar, müəllimlər və təbii ki, müharibədən qayıdan şəxslərin ailələri kimi həssas qruplar üçün güzəştli mənzillər də mövcuddur".
