Elçin Mirzəbəyli: "Bütün proseslərin arxasında ABŞ dayanır"

"ATƏT-in Minsk qrupunun keçmiş ABŞ-lı həmsədri Metyu Brayzə uzun müddət Ağ evdə çalışıb və ABŞ-ın Dağlıq Qarabağ münaqişəsinin həllinə dırnaqarası yanaşdığını çox yaxşı bilir".
Bu sözləri açıqlamasında politoloq Elçin Mirzəbəyli bildirib. Onun sözlərinə görə, Metyu Brayzənin ABŞ-ın Dağlıq Qarabağ münaqişəsinin həllinə dırnaqarası yanaşması ilə bağlı bu etirafı dilə gətirməsi gec də olsa bu gün Obama hakimiyyətinin münaqişənin həllinə, beynəlxalq hüquq prinsiplərinə olan münasibətini açıq şəkildə ortaya qoyub: "Əslində son dövrlərdə Ağ ev rəsmilərinin o cümlədən Barak Obamanın bəyanatlarından da açıq şəkildə görmək mümkündür ki, ABŞ öz maraqlarını təmin etmək üçün xalqları hətta qarşı-qarşıya qoymaqdan belə çəkinmir. ABŞ üçün hətta böyük xalqların gələcək taleyi də önəm kəsb etmir. Obamanın Ukraynadakı hadisələrlə bağlı son bəyanatında bütün proseslərin arxasında ABŞ-ın dayandığını, Rusiyanın isə baş verənlərə adekvat reaksiya göstərdiyini görmək mümkündür".