ABŞ Prezidenti Donald Trump İrana münasibətdə növbəti addımları müzakirə etmək üçün Ağ Evin Situasiya otağında milli təhlükəsizlik komandası ilə müşavirə keçirib.

"Unikal" xəbər verir ki, Axios portalının məlumatına görə, Vaşinqton Tehrana təzyiqləri artırmaq və onu davam edən danışıqlarda mövqeyini dəyişməyə sövq etmək məqsədilə genişmiqyaslı, lakin müddəti məhdud hərbi əməliyyat variantını nəzərdən keçirir.

 

Müşavirədə vitse-prezident JD Vance, dövlət katibi Marco Rubio, Mərkəzi Kəşfiyyat İdarəsinin direktoru John Ratcliffe, Birləşmiş Qərargah Rəisləri Komitəsinin sədri Dan Caine və ABŞ Prezidentinin xüsusi nümayəndəsi Steve Witkoff iştirak ediblər.

ABŞ-ın müdafiə naziri Pete Hegseth isə Floridadakı Mərkəzi Komandanlığın qərargahından videobağlantı vasitəsilə müzakirələrə qoşulub.

Mənbələrin bildirdiyinə görə, yekun qərar hələ qəbul edilməyib. Bununla yanaşı, Vaşinqton hərbi hazırlıqlarla paralel olaraq regional vasitəçilər üzərindən diplomatik təmasları da davam etdirir. Axios-un məlumatına əsasən, ABŞ administrasiyası hazırda həm hərbi, həm də diplomatik variantları nəzərdən keçirir.