Vaşinqton İranın tələblərinə cavab olaraq, iki ölkə arasındakı münaqişənin tənzimlənməsi prosesinin davam etdirilməsi üçün Tehrana özünün beş şərtini təqdim edib.
"Unikal" xəbər verir ki, bu barədə "Fars" agentliyi məlumat yayıb.
ABŞ administrasiyası hesab edir ki, bu addımlar danışıqlar üçün mütləqdir.
Agentliyin məlumatına əsasən, Birləşmiş Ştatlar İran ərazisinin bombardman edilməsi zamanı dəymiş ziyana görə hər hansı təzminat ödəməkdən qəti şəkildə imtina edir. Bundan əlavə, Vaşinqton 400 kq zənginləşdirilmiş uranın İrandan ABŞ-yə daşınmasını və İslam Respublikasının ərazisində fəaliyyət göstərən yalnız bir nüvə obyektinin saxlanılmasını tələb edir.
"Fars" agentliyinin bildirdiyinə görə, Birləşmiş Ştatlar dondurulmuş İran aktivlərinin 25 faizindən çoxunu sərbəst buraxmaq niyyətində deyil. Eyni zamanda bəyan edilir ki, bütün cəbhələrdə müharibənin dayandırılması məsələsi bilavasitə danışıqlar zamanı həll olunmalıdır.
