"Füzuli şəhərinin işğaldan azad edilməsi Azərbaycanın müasir tarixində mühüm siyasi və tarixi hadisələrdən biridir. 2020-ci il oktyabrın 17-də Vətən müharibəsinin 21-ci günündə Füzuli şəhəri və bir sıra ətraf yaşayış məntəqələri işğaldan azad edildi. Bu hadisə Azərbaycanın ərazi bütövlüyünün bərpası istiqamətində mühüm mərhələ olmaqla yanaşı, ölkənin hərbi-siyasi iradəsinin və milli birliyinin təzahürü kimi tarixə düşdü. Prezident İlham Əliyevin 2020-ci il noyabrın 17-də Füzulidə Azərbaycan bayrağını ucaltması şəhərin azadlığının dövlət rəmzləri ilə təsdiqi baxımından xüsusi əhəmiyyət daşıdı. 2023-cü il iyulun 31-də imzalanmış sərəncama əsasən oktyabrın 17-si Füzuli Şəhəri Günü kimi təsis edildi".

Bunu "Unikal"a açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.

Rəşadət Xalıqov bildirib ki, uzun illər işğal altında qalan Füzuli şəhəri və ətraf ərazilər ciddi dağıntılara məruz qalmış, yaşayış infrastrukturu və sosial obyektlər yararsız vəziyyətə düşmüşdü. Azadlıqdan sonrakı dövrdə qarşıda duran əsas vəzifələrdən biri ərazilərin minalardan təmizlənməsi, təhlükəsizliyin təmin edilməsi, müasir infrastrukturun qurulması və dayanıqlı yaşayış mühitinin yaradılması oldu. Prezident İlham Əliyevin rəhbərliyi ilə həyata keçirilən bərpa və yenidənqurma tədbirləri Füzulinin gələcək inkişafının planlı şəkildə təşkilinə yönəlib. Şəhərdə yaşayış binalarının, sosial obyektlərin, yolların və kommunal xidmətlərin inşası işğaldan azad edilmiş ərazilərin iqtisadi və sosial həyatının bərpası siyasətinin tərkib hissəsidir:

"Füzulinin yenidən qurulmasında nəqliyyat infrastrukturunun inkişafı xüsusi yer tutur. Füzuli Beynəlxalq Hava Limanının istifadəyə verilməsi Qarabağın nəqliyyat əlçatanlığının genişləndirilməsi, bölgəyə səfərlərin asanlaşdırılması və gələcək iqtisadi əlaqələrin inkişafı baxımından əhəmiyyətlidir. Müasir standartlara uyğun inşa edilən hava limanı şəhərin və bütövlükdə Qarabağın regional nəqliyyat sisteminə inteqrasiyasına töhfə verir. Bununla yanaşı, avtomobil yollarının, enerji və su təchizatı sistemlərinin qurulması, eləcə də sosial infrastrukturun inkişaf etdirilməsi ərazidə uzunmüddətli məskunlaşma və iqtisadi fəallıq üçün zəruri şərait yaradır". - deyə Rəşadət Xalıqov bildirib.

Onun sözlərinə görə, Füzulinin bərpası Azərbaycan dövlətinin Böyük Qayıdış siyasəti ilə birbaşa bağlıdır. Doğma yurdlarından məcburi köçkün düşmüş vətəndaşların təhlükəsiz, müasir və layiqli yaşayış şəraiti ilə təmin olunaraq öz torpaqlarına qayıtması bu siyasətin əsas məqsədlərindəndir. 2023-cü il avqustun 18-dən Füzuliyə sakinlərin qayıdışının başlanması şəhərin həyatında yeni mərhələnin əsasını qoydu. Yeni mənzillərin, məktəblərin, xidmət obyektlərinin və digər zəruri infrastrukturun yaradılması insanların gündəlik həyatının bərpasına xidmət edir. Bu proses, eyni zamanda, əhalinin məşğulluğunun genişləndirilməsi, sahibkarlığın təşviqi və şəhərin iqtisadi potensialının reallaşdırılması baxımından əhəmiyyətlidir.

Rəşadət Xalıqov əlavə edib ki, Füzuli Şəhəri Günü həm də işğaldan azad edilmiş ərazilərdə həyata keçirilən dövlət siyasətinin nəticələrinin qiymətləndirilməsi üçün mühüm fürsətdir. Şəhərin yenidən qurulması, müasir infrastrukturun yaradılması və sakinlərin doğma torpaqlarına qayıdışı Azərbaycanın qarşısında duran bərpa və reinteqrasiya vəzifələrinin ardıcıl icrasını əks etdirir. Füzulinin inkişafı ölkənin ərazi bütövlüyünün bərpasından sonra qarşıya qoyulan əsas məqsədlərdən birini - azad edilmiş ərazilərdə təhlükəsiz, dayanıqlı və firavan həyatın təmin olunmasını ifadə edir. Bu baxımdan, 17 oktyabr Füzulinin tarixi yaddaşında azadlığın, yenidənqurmanın və Böyük Qayıdışın rəmzi kimi xüsusi yer tutur.