Azərbaycan, Rusiya və İran prezidentləri İlham Əliyev, Vladimir Putin və Məsud Pezeşkian arasında Türkmənistanda keçirilən üçtərəfli görüş ilkin cədvəldən kənarda baş tutub.
"Unikal" xəbər verir ki, bu barədə Rusiya prezidentinin mətbuat katibi Dmitri Peskov jurnalist Pavel Zarubinə məlumat verib.
Kreml sözçüsünün sözlərinə görə, liderlərin görüşlərinin cədvəli Xəzər Ətraf Mühit Sammitindən sonrakı tədbirlər zamanı dəyişdirilib.
"Türkmənistan prezidenti ilə görüş, dərhal sonra cədvəldə dəyişiklik və ertəsi gün keçirilməsi planlaşdırılan İran prezidenti ilə görüş keçirildi. Necə deyərlər, bir çox şey dərhal dəyişir. Putin, Əliyev və Pezeşkian arasında gözlənilməz üçtərəfli görüş oldu", - deyə Peskov bildirib.
Danışıqlar zamanı üç prezidentin enerji də daxil olmaqla müxtəlif sahələrdə əməkdaşlıq məsələlərini müzakirə etdiyi bildirilir.
Görüşdən sonra əldə edilən razılaşmaların təfərrüatları açıqlanmayıb.
