Bakıda 1home-un ofisində memarlıq, dizayn və layihələrin idarə olunmasında müasir yanaşmaların müzakirəsinə həsr olunmuş görüş keçirilib. Jurnalistlərin iştirakı ilə təşkil olunan görüş peşəkar fikir mübadiləsi, təcrübə paylaşımı və yeni əlaqələrin qurulması baxımından əhəmiyyət daşıyıb.
"Unikal" xəbər verir ki, görüşdə beynəlxalq platformalarda Azərbaycanı təmsil edən memar Aytac İmanova və 1home-un təsisçisi Nigar Babayeva Hacıyeva müasir memarlıqda dizayn yanaşmaları, büdcənin planlaşdırılması, funksionallıq və layihələrin idarə olunması ilə bağlı təcrübə və fikirlərini bölüşüblər.
Müzakirənin əsas istiqamətlərindən biri memarlıqda estetik həllərlə praktiki ehtiyaclar arasında balansın qorunması olub. Layihələrin uğurunda düzgün planlaşdırmanın, büdcə idarəetməsinin və məkanın istifadə məqsədinə uyğun təşkilinin rolu diqqətə çatdırılıb. Eyni zamanda, dəyişən tələblər fonunda memarlıq və dizayn sahəsində yeni iş yanaşmalarının əhəmiyyəti müzakirə olunub.
Beynəlxalq təcrübəsi ilə seçilən memar Aytac İmanovanın iştirakı görüşə peşəkar perspektiv qazandırıb. Nigar Babayeva Hacıyeva ilə birgə aparılan müzakirə memarlıq və dizayn məsələlərinə həm yaradıcı, həm də idarəetmə baxımından yanaşmağa imkan verib.
Görüş jurnalistlər üçün də sahənin aktual mövzularını birbaşa mütəxəssislərlə müzakirə etmək, fərqli baxış bucaqlarını dinləmək və gələcək materiallar üçün yeni mövzular müəyyənləşdirmək imkanı yaradıb. İştirakçılar arasında qurulan peşəkar ünsiyyət isə media nümayəndələri ilə sahə mütəxəssisləri arasında əlaqələrin inkişafına zəmin yaradıb.
Belə görüşlər memarlıq və dizayn sahəsində aktual məsələlərin daha geniş auditoriyaya çatdırılmasına, peşəkar təcrübənin paylaşılmasına və media ilə mütəxəssislər arasında davamlı dialoqun formalaşmasına töhfə verir.
