Prezident İlham Əliyevin yerli televiziya kanallara müsahibəsində Azərbaycanın Qəzzaya sülhməramlı qüvvə göndərməyəcəyini açıq şəkildə bəyan etməsi yalnız ölkə daxilində deyil, eyni zamanda, Türkiyə ictimaiyyətində də diqqətlə izlənilib və bütövlükdə müsbət qarşılanıb.

“Unikal"apa-ya istinadən xəbər verir ki, dövlət başçısının bu bəyanatı Türkiyənin sosial media platformalarında və ictimai müzakirə mühitində geniş rezonans doğurub.

Sosial mediada Azərbaycan Prezidentinin mövqeyini təqdir edən xeyli sayta paylaşım edilib.

Bu paylaşımlardan və onlara yazılan şərhlərdən aydın olur ki, İsrail-Fələstin məsələsi, eləcə də Qəzza ilə bağlı Azərbaycanın tutduğu mövqeyə əvvəlki tənqidi yanaşmalar xeyli zəifləyib, Türkiyə ictimai fikrində dəyişiklik baş verib.

Bu reaksiya həm də onu göstərir ki, Türkiyə ictimaiyyəti Azərbaycan rəhbərliyinin emosional çağırışlardan uzaq, milli maraqlara söykənən və məsuliyyətli xarici siyasətini getdikcə daha aydın şəkildə anlayır və qəbul edir.

Türkiyə ictimai rəyində əsas yanaşmalar

Aparılan müşahidələr göstərir ki, Türkiyədəki sosial şəbəkə istifadəçilərinin əhəmiyyətli hissəsi Prezident İlham Əliyevin açıqlamasını prinsipial, realist və milli maraqlara söykənən siyasi mövqe kimi qiymətləndirir. Xüsusilə “Facebook” “X”, “Instagram” və “YouTube” platformalarında edilən paylaşımlarda aşağıdakı məqamlar ön plana çıxıb:

- Azərbaycanın emosional deyil, dövlət maraqlarına əsaslanan xarici siyasət yürütməsi;

- Regiondan kənar münaqişələrdə birbaşa hərbi iştirakdan yayınaraq, balanslı və məsuliyyətli mövqe sərgiləməsi;

- Humanitar məsələlərlə siyasi-hərbi öhdəliklərin bir-birindən fərqləndirilməsi.

Bir çox istifadəçi qeyd edib ki, Qəzza məsələsində humanitar dəstək və diplomatik mövqe ilə hərbi iştirakın qarışdırılmaması dövlətçilik baxımından doğru yanaşmadır.

Liderlik və qətiyyət vurğusu

Sosial şəbəkələrin Türkiyə seqmentində paylaşımların bir hissəsində Prezident İlham Əliyevin adı qətiyyətli liderlik nümunəsi kimi çəkilib. Bəzi şərhlərdə onun açıq və emosiyaya qapılmadan verdiyi cavablar regional liderlər üçün nümunə kimi göstərilib. Sosial şəbəkə istifadəçiləri vurğulayıblar ki, bu mövqe Azərbaycanın suveren qərarvermə qabiliyyətini və müstəqil xarici siyasət kursunu nümayiş etdirir.

Xüsusilə “öz maraqlarını hər şeydən üstün tutan dövlət” yanaşması Türkiyə ictimai rəyində anlayışla qarşılanıb və dəstək tapıb.

Ümumilikdə aparılan araşdırma göstərir ki, Prezident İlham Əliyevin Qəzza ilə bağlı səsləndirdiyi mövqe Türkiyə ictimaiyyətində mənfi reaksiya doğurmayıb, əksinə, böyük ölçüdə hörmət və anlayışla qarşılanıb. Bu, bir daha göstərir ki, Azərbaycan–Türkiyə münasibətlərində emosional gözləntilərdən çox, qarşılıqlı suverenlik və milli maraqlara hörmət əsas meyar kimi qəbul olunur.

Bu yanaşma həm də Azərbaycanın beynəlxalq məsələlərdə müstəqil, ölçülüb-biçilmiş və strateji düşüncəyə əsaslanan siyasət yürütməkdə davam etdiyini nümayiş etdirir.